تجربتي مع تونر خل التفاح للبشرة الدهنية

تعرفوا على روعة تجربتي مع تونر خل التفاح للبشرة الدهنية بشكل خاص وللبشرة بشكل عام , تجربة سهلة وفعالة والروعة انها متوفرة عند الجميع .

 ان كنتم جربتوا كل شيء من غسول بشرة وتونر وكريمات تجارية  للتخلص من حب الشباب على بشرتكم, وما نفع الموضوع معكم , فبنصحكم وبشدة تجربوا تونر خل التفاح الطبيعي, المناسب جدا جدا للبشرة الدهنية, اعرفي معي كيف تصنعي تونر للبشرة الدهنية من البيت وبأبسط المواد واروعها وهو الخل.

انا حاليا الحمدلله ما بعاني من حب الشباب والفضل بيعود الى كثير مواد من الطبيعية واللي على رأسهم جل الصبارالطبيعي والكركم للوجه اللي يعتبر سر من اسرار جمال بشرة النساء الهنديات وشباب بشرتهم واستخدام السدرة كغسول يومي لبشرتي,  والاهم اني قطعت الحليب والطحين الابيض اللي بعد قطعهم حليت مشكلة حب الشباب بالاضافة الى بعض المكملات اللي رح اتحدث عنها في الموضوع التالي, اعرفي اكثر >> كيف تتخلص من حب الشباب عن طريق تنظيف الكبد

نرجع للموضوع :) , الحمدلله وجدت بديل للغسول التجاري بـأكثر من بديل طبيعي ولسه في غيرهم رح اذكركهم بعدين, لكن كان فاضل اللي اني اجد التونر الطبيعي , مع اني الفترة الماضية ما كنت استخدم تونر وكانت بشرتي ممتازة, ولكن حبيت اني اضيف التونر والاحظ الفرق , هل بشرتي رح تتحسن اكثر, او ما اله داعي؟ فكانت اول تجربة هي عمل تونر بخل التفاح.

بالبداية كيف كانت تجربتي مع تونر خل التفاح لبشرتي ؟

استخدمت التونر بعد غسل الوجه وتنظيفه , كنت اشعر بشرتي اكثر نظافه , لفت نظري انه يخلص ويقلل من فرصة تشكل الحبوب الصغيرة التي قد تتكون من فترة لفترة , والبشرة انعم , وسأذكر الان الفوائد اكثر منفصلة , كنت استخدمه عن طريق الرش اكثر من القطن في بعض المرات , احيانا اتركه واحيانا اغسل وجهي سريعا بعده .

ما فوائد تونر خل التفاح للبشرة الدهنية من تجربتي :

♥ يمنح البشرة النعومة, خصوصا لو كنتم من مستخدمين الغسولات التجارية اللي تسبب جفاف البشرة, يوازن PH  للبشرة.

♥ يصغر من حجم مسامات البشرة.

♥ يخفف جدا من بقع واثار حب الشباب.

♥ يخفف من اثار الشمس واثار تقدم العمر.

♥ يوحد لون البشرة بشكل عام.

♥ ينهي مشكلة حب الشباب : الكثير من تجارب اللي استمروا على استخدام خل التفاح كتونر على بشرتهم , بيقسموا انه خل التفاح كان السبب في انهاء حب الشباب والتخلص منه خلال اسابيع!!!

ملاحظة جدا مهمة :  استخدموا خل التفاح الطبيعي نوعية ممتازة ويكون اورجانك افضل وافضل ولازم ما يكون صافي, مهم يكون فيه شوائب, غير هيك الخل ما رح يفيدكم لو كان نوعية تجارية ورح يضركم جدا ويضر بشرتكم, ازا ما لقيتوا خل التفاح الطبيعي نوعية جيدة, ما بنصحكم تجربوا التونر, انتظروا لما تلاقوا نوع ممتاز

 طريقة عمل تونر خل التفاح الطبيعي | تونر للبشرة الدهنية :

♥ رح تحتاجي الى علبة نظيفة ومعقمة وتم غسلها بـ بيكربونات الصوديوم.

♥ ضيفي ربع العلبة خل التفاح, وهو المادة الفعالة في تونر للبشرة الدهنية .

♥ كملي باقي العلبة بماء مفلتر.

♥ اخلطي جيدا وعلى بشرة نظيفة بعد غسلها من اي مكياج او شوائب , استخدمي تونر خل التفاح.

ملاحظة : كتير مهم تراعي كمية خل التفاح الى الماء, يعني لو بشرتك جدا حساسة ممكن تقللي الكمية الى اقل من ربع العلبة, ولو بشرتك عادية ممكن حتى تزيدي الكمية كمان شوي, في البداية التزموا بنسبة 1: 3 وجربوا , ولكن مستقبليا ممكن تزيدوا او تقللوا.

طبعا ما رح احكي انه الرائحة  مو حلوة بالمرة, اكيد عارفين :) , فأكيد ممكن تتقبلوها وممكن لا, ممكن تخلوه شوي على البشرة ثم تغسلوه بالماء.

اعرفي ايضا عن البيض للبشرة :) , اعرفي اكثر >> تجربتي مع بياض البيض للوجه

تابعوني على تويتر او موقع التواصل المفضل لديكم من هنا >> صديقات المدونة  وايضا تجدوا فيه لينك الفهرس لتعرفي اكثر عن عنايتي الداخلية والخارجية الطبيعية لبشرتي او شعري او صحتي ♥

أتمنى اني اكون افدتكم واتمنى اسمع ارائكم في طريقة تونر للبشرة الدهنية من خل التفاح وكتير سهل تعملوا تونر طبيعي لبشرتكم وتتخلصوا من منتج تجاري اخر ♥, واكيد حذكر تونر اخر يناسب البشرات المختلفة, لو حبيتي تكوني في قائمة الاصدقاء لمدونة حياتي وردي ليصلك كل المواضيع المفيدة لك والمختلفة اشتركي في قائمة اصدقاء المدونة في القوائم اعلاه, واحب اعرف طريقة تونر للبشرة الدهنية من صنعك؟

طريقة استخدام ماكينة ازالة الشعر براون و تجربتي مع الة براون

طريقة استخدام ماكينة ازالة الشعر براون و تجربتي مع الة براون 

اليوم اشارككم طريقة استخدام ماكينة ازالة الشعر براون حتى تتجنبي المشاكل اللي ممكن تحدث معك , والكلام يطبق على اي الة نزع شعر عندي , لكن هي المتوفرة عندي وهي اللي جربتها .

ما هي اسهل طريقة لازالة الشعر ؟ سؤال مهم فعلا . مشكلة الشعر الزائدة من اكثر المشاكل المزعجة عند اي سيدة, وموعد ازالة الشعر هو موعد مزعج ومتعب لها, وهذا بعود للطرق التقليدية لازالة الشعر مثل السويت وغيره من الطرق المؤلمة جدا, لكن مع الة نزع الشعر بالنسبة لي الوضع اختلف كثيرا, خصوصا انها اسهل طريقة لازالة الشعر واسرعها, واللي تتعود على استخدامها اكيد بتفهم شو بقصد, خليكي معي حتى تتعرفي اكثر على اسهل طريقة لازالة الشعر بالنسبة لي واجدها سريعة كذلك وبلا استهلاك والاهم سأبين لكم طريقة استخدام ماكينة ازالة الشعر.

برأي حلو نتماشى مع التطور الايجابي, وهناك الكثير من اجهزة ازالة الشعر, اللي تزيل الشعر بصورة ممتازة وبأي طول وفي أي وقت, ولا تحتاج الى أي مواد اضافيه.

الكثير من البنات رأيهم سلبي في الة نزع الشعر, مع العلم انها جدا عملية وموفرة للوقت وغير هيك اسهل من السويت بكتير ولكن مهم نعرف بعض النقاط حتى نستفيد اقصى استفادة من الة نزع الشعر

انا بستخدم الة نزع الشعر براون سيلك ابل, وجدا راضية عنها, وكانت بديل ممتاز لكثير من وسائل ازالة الشعر, واستخدمها في أغلب أماكن الجسم.

مميزات استخدام الة نزع الشعر عن اي وسيلة اخرى| اسهل طريقة لازالة الشعر

♥ ازالة الشعر بأي طول كان, حتى لو كان الشعر جدا قصير, وهذا جدا مهم.

♥ سهلة في الاستعمال, عكس السويت مثلا اللي كتير البنات يجدوها صعبة وتحتاج الى وقت وجهد وتعب, برأي الة نزع الشعر هي اسل طريقة لازالة الشعر.

♥ أسرع واخف في الاستعمال عن اي طريقة اخرى.

♥ استعمالها شخصي جدا, بكل بساطة ممكن اي بنت تعمل لوحدها بدون حاجة الى اي حد يساعدها في عملها وبكل بساطة ( خصوصية اكثر).

♥ أنظف جدا من السويت وخصوصا في الصيف!!

♥ الشعر يحتاج وقت حتى يرجع يظهر مثل السويت, وهذا ايضا يرجع لطبيعة نمو الشعر عند كل بنت لأنها تختلف.

♥ نمو الشعر بيكون انعم من كل مره, الألم اخف من كل مره ومع التعود سيكون الألم معدوم, حتى عن تجربة كثافة الشعر جدا تقل.

♥ أهم نقطة انها عملية جدا جدا ومسعفة في اضيق الاوقات. 

ما هي طريقة استخدام ماكينة ازالة الشعر براون

♥ تقشير الجسم بطريقة خفيفة بأي مقشر متعودين عليه, قبل بوقت, ويفضل أخد شاور دافئ حتى نجهز الجلد لعملية نزع الشعر.استخدمي المقشر الطبيعي التالي, اعرفي اكثر >> سكراب الأرز المطحون للجسم

♥ مهم كتير الجسم يكون نظيف وناشف وغير مدهون بأي زيت او اي كريم.

♥ استخدام الألة بعكس اتجاه نمو الشعر.

♥ استخدام الألة بشكل عامودي بزاوية 90 درجة على اي مكان بنزيل منه الشعر حتى يتم ازالتها من الجذور وليس قصها ( بمعني لازم يكون الرأس على الجلد بزاوية قائمة وغير مائل!!!)

♥ مري على المكان ببطء , مهم كتير ما تكوني سريعة بالحركة مشان ما تقوم بقص الشعرة, لما تكون ببطء رح تشيل الشعر من جذوره وما رح تحتاجي تعيدي عالمكان اكثر من مرة.

♥ بعد الانتهاء قومي بترطيب الجسم بزيت الزيتون فقط وبدون غسله بالماء, زيت الزيتون رح يكون مرطب طبيعي ومهدئ للمكان, عدى انه رح يخفف من نمو الشعر. بإمكانك تعرفي تجربتي معه زيت الزيتون بعد ازالة الشعر


بصراحة انا ما بستغني عن الة نزع الشعر وبشوفها اسهل طريقة لازالة الشعر ايضا, وما واجهتني مشاكل, لكن اللي بيواجهوا مشاكل مثل النقاط السوداء في الساق, السبب مو في الالة, السبب في قلة تقشير الجسم وترطيبه, ازا حافظتي على تقشير جسمك دوريا وقمتي بترطيبه, بعمرك ما رح تواجهي هيك مشكلة, اعرفي اكثر >> كيفية التخلص من الشعر تحت الجلد في الساقين  

تابعوني على تويتر او موقع التواصل المفضل لديكم من هنا >> صديقات المدونة  وايضا تجدوا فيه لينك الفهرس لتعرفي اكثر عن عنايتي الداخلية والخارجية الطبيعية لبشرتي او شعري او صحتي ♥

 برأيك ما هي اسهل طريقة لازالة الشعر بالنسبة لك؟

ترتيب البيت بسرعة مع تنظيم لوقت الانشغال

ترتيب البيت بسرعة مع تنظيم لوقت الانشغال

في بعض الايام بيكون وقتنا مو ملكنا ويكون حلم حياتنا هو ترتيب البيت بسرعة وبعصى سحرية, لكن كلنا بنعرف انه ما فيه هالعصا, وبنحتاج لوقت كبير خارج البيت, لعمل او لدراسة, وبتختلف اولوياتنا من يوم ليوم, فممكن يكون صعب نعمل الروتين اليومي لتنظيف البيت كما  لو كنا جالسين بالبيت نهارنا كامل, فحلو نعرف بعض الخطوات والطرق حتى يكون البيت نظيف او على الأقل يظهر بمظهر مرتب أكثر بدون جهد زائد او عناء غير مرغوب فيه, انا هنا اتكلم عن تحضير البيت بشكل عام حتى يكون العمل فيه أقل تعباً واسرع, ابقي معي لتعرفي اكثر عن ترتيب البيت بسرعة ؟

نصائح وطرق للحصول على بيت منظف عن طريق ترتيب البيت بسرعة بتنظيم:

♥ تخلصي من الكراكيب والاغراض الغير مستخدمة : ان كنتي تقومي بالتخلص من الكراكيب او اي اشياء لم تعودي بالحاجة لها كل فترة, البيت رح يكون اخف وارتب واسرع واسهل في التنظيف ورح يكون بمظهر مرتب اكثر من لو كان في اغراض كثير واغلبها غير مستخدم, ببساطة استغلي نصف ساعة او اقل في التخلص من الكراكيب يوميا وبصورة مستمرة, اعرفي اكثر >> كراكيب البيت

♥ لا تملئ البيت بالكثير من التحف والمزهريات في كل مكان, في كتير من التحف الجميلة جدا والعصرية وتكون قطعة واحدة وحجمها مقبول وتضع على الطاولة وتحتها شرشف جميل, افضل من اكتر من تحفة واكثر من برواز صور, وتذكري انه كل تحفة زائدة او برواز صور زائد يعني وقت تنظيف وترتيب اكبر, ضعي التحف الاجمل والصور الأهم, وجود الكثير من الكماليات يعيق عملية ترتيب البيت بسرعة . 

♥ وجود قطع أثاث فيها أماكن تخزين او صناديق فكرة ممتازة وعملية, حيث يمكن وضع فيها الكثير من الأشياء, مثل المجلات والجرائد وريموت التلفاز او العاب الاطفال المستخدمة يوميا, حيث بعد نهار طويل تقومي بالاحتفاظ بهذه الاشياء داخل الصناديق ويظهر المكان العام بشكل أرتب وبأقل فوضى ممكنه.

♥ بحب الاحتفاظ بأي اغراض في خزانات مغلقة والاحتفاظ بأهم الاغراض على الاسطح, الفكرة من هالشي انه عملية التنظيف بتكون اسهل واسرع, فعلى رف الحمام مثلا احتفظ فقط بسائل غسل اليدين فقط, فتنظيفه يحتاج فقط الى رش المنظف على السطح ومسحه فورا وانتهينا, ما له داعي ارفع اكثر من غرض وامسحهم وامسح المكان ثم ارجعهم, في كل بساطة لكل شيء مكانه وخزانته, ودائما كل شيء نظيف فيهم.

♥ قومي بمسح كل شيء من الغبار بشكل يومي وبشكل سريع بالمنظف وتأكدي انك لم تنسي أي مكان , حتى تتأكدي من نظافة كل شيء , ان كل شيء في مكانه الخاص والبيت غير مكتظ بالأغراض, من المفترض العملية لا تستغرق اكثر من 15 دقيقة كحد اقصى مع الحمام والمطبخ !! انا اقوم بصنعه بنفسي, اعرفي اكثر >> ملمع خشب طبيعي

♥ مري على كل البيت بشكل سريع ورجعي كل شيء مكانه الصحيح, ولتكن عادة عندك ارجاع كل شيء مكانه دائما, ستذهلي من الفرق.

♥ لا تترددي في طلب المساعدة من أبنائك, مهما كان عمرهم فيجب ان يتعلموا مساعدتك ولو على الأقل في غرفهم, اعتقد يجب عليهم المشاركة في الترتيب.

♥ في الأيام المشغولة فيهم , اعتمدي اكثر على اكل الفواكه وعمل العصائر الطبيعية اكثر, رح تعطيكي طاقة اكبر وصحة اكثر, ولن يضيع الوقت كله في تجهيز الطعام, عدى ان اكل الفواكه لن يجعلك تشعري بالتخمة بعده والتعب مثل الاكل العادي, حبي نفسك ايضا, اعرفي اكثر >> كيف احب نفسي

كل الموضوع يصب في استغلالك الوقت بطريقة صحيحة اثناء وقت فراغك او وقت غير انشغالك الكثير , ان كان اساس بيتك صحيح فلن يكن عندك مشاكل لو انشغلتي فترة معينة من وقتك, ترتيب البيت بسرعة بحاجة الى تنظيم وترتيب دائم عن طريق تحديد ما انت فعلا بحاجته في البيت و موازنة مع متطلبات اسرتك. تعلمي دائما التخلص من كل هو زائد من الأغراض... المهم انتي وليس كم الاغراض.

لزيارة الفهرس او لمتابعتي على تويتر او موقع التواصل المفضل لديكم من هنا >> صديقات المدونة  وايضا تجدوا فيه لينك الفهرس لتعرفي اكثر عن عنايتي الداخلية والخارجية الطبيعية لبشرتي او شعري او صحتي ♥

بتمنى للجيمع صحة دائمة يارب, لا تنسوا تشتركوا في المدونة حتى يصلكم كل جديد من قائمة الاصدقاء من القوائم اعلاه, وما هي نصائحك كي نقوم بـ ترتيب البيت بسرعة .

تجربتي مع بيكربونات الصوديوم للشعرعام كامل كبديل لشامبو No Poo Method

تجربتي مع بيكربونات الصوديوم للشعرعام كامل كبديل لشامبو  No Poo Method

ممم بيكربونات الصوديوم للشعر !! ممكن هل تنفع او لا تنفع؟ خليكي معي حتى تعرفي تجربتي مع بيكربونات الصوديوم للشعر وخصوصا غسل الشعر باستخدامها ♥ من مبدأ البعد عن كل شيء موجود فيه مواد كيميائية صناعية ضارة مسرطنة و أيضاً مدة فعاليته مؤقتة بس فترة استخدام المنتج، بدأت رحلتي بالبحث عن بدائل طبيعية, وكان اهم شرط لهذا البديل انه يكون يؤدي الغرض الرئيسي منه وايضا افضل منه, خصوصا الشامبو فيه مادة السلفات اللي تمتص كل الزيوت المفيدة من فروة الشعر, وهاي المادة اللي تعمل الرغوة في الشامبو, وكل ما زادت رغوة الشامبو كل ما كان مضر أكثر (اضرار الشامبو), كانت اول ماده لي هي بيكربونات الصوديوم للشعر او الصودا.

الشامبو, المادة الاكثر استخداما للشعر واللي ما بنقدر نستغني عنها بسهولة , والحمد لله قدرت استغني عن الشامبو وبصراحة ما بفكر ارجع له بعد النتيجة اللي حصلتها, في البداية الفكرة اللي رح اطرحها كتيييييييييير ناس بالدول الاجنبية بيطبقوها من سنين ولكن للأسف قليل منا عرفها وطبقها واستفاد منها. (لطفا قراءة الموضوع للأخر :)     )

ما رح نغسل شعرنا بالشامبو لكن بشو رح نغسله؟ البدائل الطبيعية كثيرة لكن رح اعرض اول تجاربي:

غسل الشعر بيكربونات الصوديوم !!

No POO Method for Hair!!

نعم , انا بغسل شعري بيكربونات الصوديوم، بيكربونات  الصوديوم تقوم بتنظيف فروة الرأس جيداااااااا بدون امتصاص الزيوت الطبيعية اللي في الفروة التي تقوم بتغذية الشعر, الشامبو عدا انه كله كيماويات , هو يقوم بامتصاص الزيوت الطبيعية من الشعر ويسبب جفافه وتساقطه.

 

نتائج استخدام بيكربونات الصوديوم للشعر ؟ ما هي نتائج غسل الشعر بها ؟

♥ أول شي لاحظته من اول استخدام التساقط قل كتيييير, يعني وانا بغسل بشعري ما لاحظت كمية الشعر اللي سقطت من رأسي كتير مثل ما كانت بالشامبو!!

♥ كثافة اكتر, الشعر يظهر بمظهر كثيف على غير المعتاد بعد استخدام الشامبو.

♥ الشعر ما زيت بسرعة, يعني شعري يبقى بمظهر نظيف غير لامع من الزيت لمدة اكتر من اسبوع!! وبصراحة شيء جدا رائع. 


♥ سهل التمشيط, جداااااااا الشعر يصبح انعم بشكل ملحوظ وهذا بسبب انه زيوت الشعر الطبيعية بقت في الفروة والشعر استفاد منها.

♥ اللي شعرهم كيرلي كتير رح يلاحظوا انه الشعر ما عاد متطاير مثل الاول.

♥ عدد غسلات الشعر بتقل جدا, يعني بدل ما اغسل شعري 3 مرات بالأسبوع, هلأ بيحتاج شعري غسيل فقط مرة واحدة اسبوعيا, وصدقوني شعري بيكون نظيف ومو بحاجة, علما اني ممكن يوم ورا يوم اغسله بالماء فقط, لأني العب رياضة .

♥ نمو شعر جديد وايضا شعرت بفرق في طول شعري, يعني من ثاني شهر كان في فرق بالطول .

♥ اكيد فائدة مادية , سعر بيكربونات الصوديوم لا يذكر بمقابل الشامبو اللي كنت اشتريه بسعر جدا غالي.

رح نحتاج الى المواد التالية حتى نقوم بإستخدام بيكربونات الصوديوم للشعر :

♥ بيكربونات الصوديوم.

♥ خل التفاح الطبيعي

♥ علبة عادية لكربونات الصوديوم او كوب نخصصه له

♥ علبة سبراي للخل التفاح الطبيعي.. .

الطريقة استخدام بيكربونات الصوديوم للشعر و غسل الشعر بيكربونات الصوديوم :

♥ نذوب ملعقة كبيرة من بيكربونات الصوديوم مع كوب ماء في الوعاء المخصص له

♥ نشطف الشعر بالماء كله , يعني لازم شعرنا يكون مبلول كتير.

♥ نضع محلول بيكربونات الصوديوم على فروة الراس ونقوم بتدليكها لمدة دقيقة حتى نتأكد من نظافتها.

♥ نشطف الشعر كاملا بالماء جيدا حتى نتأكد من تخلصه من اي اثار لكربونات الصوديوم.

♥ نتأتي لدور البلسم, نضع ملعقتين خل التفاح الطبيعي مع كوب ماء ثم نوزعه بالسبراي على الشعر دون الفروة, ليعمل عمل البلسم , ونتركه لمدة 5 دقائق ثم نشطفه جيدا بالماء, رائحة الخل بتروح بعد شطفه بالماء.



لكن ! الموضوع مو بهاي السهولة والبساطة , اول شهر كنت بدي أوقف الموضوع كله , شعري صار كله زيت , كان في أسوء حالاته , لكن قررت اني اكمل ، لأنه جميع من جرب طريقة غسل الشعر بكربونات الصوديوم لازم يمر بمرحلة انتقالية للشعر حيث انه كان متعود على مواد كيميائية واصبحنا نعامله بطريقة اخرى طبيعية اكتر, فالشعر يحاول التأقلم عليها ويبدأ فرز كمية زيت اكثر لكن بعد فترة اقصاها شهر رح يبدأ الشعر في التأقلم على الوضع الجديد والطريقة الجديدة في التنظيف و رح تشوفي نتائج الطريقة الايجابية الرائعة.

أتمنى تحاولوا تجربوا هاي الطريقة وانتوا ما عندكم مناسبات لمدة شهر, لكن صدقوني بتستاهل, لأنو بعد شهر( او حسب حالتكم ) الشعر رح يتغير كتير ورح يصير صحي اكتر وبالتالي كل المشاكل رح تنحل, ورح تتمنوا لو من زمان جربتوا هالطريقة.

ملاحظات عن استخدام بيكربونات الصوديوم للشعر و غسل الشعر به :

♥ تذكري انه لما تاخذي قرار انه توقفي الشامبو, انه الموضوع مو بهاي السهولة, وبدك تتحملي من فترة 15 يوم الى شهر شعرك بحالة سيئة وجدا زيتي, وتذكري انها فقط مؤقتة.

♥ قليلي او زيدي كمية بيكربونات الصوديوم حسب حاجة فروتك, انا بحتاج الى ملعقة كبيرة, بس اختي ملعقة ونصف.

♥ خل التفاح جدا كافي كبلسم للشعر, رح ينعم العشر ويحافظ على نعومته, ونحرص انه يكون طبيعي 100%.

♥ اغسلي شعري بهاي الطريقة كل 5 ايام او 7 ايام , مو اكتر او اقل, وانتي بنفسك هتشوفي الفترة المناسبة الك بعد فترة. ( لكن ممكن مرتين بالاسبوع كحد اقصى في البداية)

♥ مهم كتير تعرفي انه الكربونات للفروة كمنظف, والخل كبلسم للشعر والفروة

♥ ابعدي عن كريمات التصفيف المحتوية على السيليكون, لأنه يغلف الشعرة, مع اني افضل انك تبعدي عن كريمات التصفيف هاي الفترة, للحصول على افضل النتائج.

 
بإمكانك ايضا تنظيف الشعر بالطمي المغربي (الغاسول), البيض  (لتنظيف شعرك بعد اي حمام زيت ودون الحاجة الى استعمال الشامبو), اعرفي اكثر >> الغاسول للشعر

تحديث 1 : تنظيف الشعر وتجربتي مع بيكربونات الصوديوم للشعر الصوديوم فقط للسنة الاولى, لكن في السنةالثانية انا اقوم بتجريب مواد طبيعية اخرى التي ذكرتها سابقا.

تحديث2 : بعد السنة الاولى لاستخدامي لكربونات الصويديوم حولت لطرق اخرى مثل الطمي والبيض وغيرهم كثير, ولكني ايضا عملت ابحاث هل الكربونات مضرة, وخصوصا انها ممكن ما تناسبك الطريقة وما تناسب شعرك, لذلك اقرأي اكثر في الموضوع التالي : اعرفي اكثر >> أضرار بيكربونات الصوديوم للشعر

تابعوني على تويتر او موقع التواصل المفضل لديكم من هنا >> صديقات المدونة  وايضا تجدوا فيه لينك الفهرس لتعرفي اكثر عن عنايتي الداخلية والخارجية الطبيعية لبشرتي او شعري او صحتي ♥

لو حبيتي تكوني في قائمة الاصدقاء لمدونة حياتي وردي ليصلك كل المواضيع المفيدة لك والمختلفة اشتركي من القوائم اعلاه ولا تنسي احب اعرف تجربتك مع بيكربونات الصوديوم للشعر :)